Subsidioa, etxe askotako poza

  SUBSIDIOA, ETXE ASKOTAKO POZA

Gaur egun, milaka eta milaka herritar dira arrazoi bat edo beste batengatik lanik gabe geratzen direnak. Egindako ikerketen arabera, Espainian %14,1eko langabezia dago. Argi dago ehuneko horretako pertsona batzuek ez dutela ahaleginik egiten lana bilatzeko; beste asko, ordea, lan  bila ari dira etengabe, merezi duten bizimodua aurrera eramaten lagunduko dietelako esperantzan.

Azken herritar hauen oztopo handienetariko bat beren adina da. Jakina da edozein enpresak langile gazteei lana aurkitzeko aukera gehiago ematen diela helduei baino, nahiz eta azken hauek oso langileak izan. Lanik gabe gelditzen direnek bi urtez langabezia kobratzeko aukera dute, baina urte hauen ostean, lana bilatzeko izugarrizko beharra dute.  Horregatik, Espainiako Ministroen Kontseiluak lege berri bat sortu du 52 urte gorako herritar langabe guztientzat. Lege berri honen arabera, aipatutako ezaugarri horiek duten herritarrek subsidioa jasoko dute, langabezia kobratu ondoren datozkien urteei aurre egiteko.

Eskertzekoa da estatuak horrelako egoera pairatzen ari diren pertsonei diruz laguntzea, jakinda gaur egun denok dugula zorrak ordaindu beharra. Kontu korrontean diru-sarrera hori edukitzea oso lagungarria izango da zalantzarik gabe. Bizitzan etorkizun duina edukitzea da herritar guztion helburuetako bat; beraz, Madrilgo Gobernuak aurrera eramandako proposamen berri honek erraztu egingo die herritar askori  xede hori lortzen­­­­.

- Erabilitako informazio iturria: https://elpais.com/economia/2019/03/07/actualidad/1551977623_345068.html