Energia-iturri berriztagarriak

Historian zehar, gizakiari bizitzeko beharrezkoa egin zaion energiari esker gizartea hazten joan da, eta horrek eboluzio bat suposatu du. Gure eguneroko bizitzako zati txiki bakoitza energiari lotuz joan dela ikus dezakegu; esate baterako, argi artifiziala, kalefakzioa, hozkailua, edo garraioa egunero erabiltzen ditugun baliabideak dira. Baina nondik ateratzen dugu haien erabilpenerako energia?

Ekonomikoki energia-iturri errentagarrienak beti izan dira petrolioa, ikatza, gas naturala eta uranioa. Hala ere, ez dira inondik inora ere aukera egokienak ingurunearekiko errespetuaz hitz egiterako garaian. Izan ere, hauen gehiegizko erabilera egiten da eta energia-iturri ez berriztagarriak direnez gero, egunen batean amaitu egingo dira. Beraz, non dago baliabide natural horiek ustiatuz ahalik eta etekin handiena ateratzeko muga?

Arazo horrek aurrera jarraitzekotan, etorkizunean energiarik gabe bizitzeko arriskua egongo da, beraz, azken urte hauetan, horretan pentsatzen ibili dira zientzialariak eta aurretik aipatutako energia-iturriei alternatiba batzuk ematea lortu dute: energia-iturri berriztagarriak. Azkeneko hauei buruz hitz egiten ari garenean, sorrera-iturri moduan baliabide berriztagarriak erabiltzen dituztenei buruz ari gara, hau da, energia-iturri ez berriztagarriak ez bezala, gizakiak planeta honetan bizirik iraungo duen denboran, iturri agorrezinen jabe direnei buruz. Gainera, modu jarraitu batean, hau da, etengabe, ekoizten dira, ez dira agortzen eta haien iturburua prozesu naturalen bidez ematen da. Haizea, eguzkia, ur-lasterrak, materia organikoaren deskonposizioa, itsasoko olatuen mugimenduak eta lurraren barnealdeko beroa dira energia-iturri berriztagarri ezagunenak.

Nolanahi ere, energia-iturri berriztagarrien kostua oso altua denez, haien merkaturatzea nahiko motela da. Baina, hala ere, egunez egun energia konbentzionalen prezioa igotzen ari den heinean eta meategiak agortzen ari diren heinean, energia berriztagarriak lekua hartuz doaz merkatuan, eta baliabide onuragarriak bilakatzen ari dira. Hortaz, mugara iritsi aurretik, energia-iturri berriztagarrien erabilpena sustatu nahiko nuke krisi hau amaitu eta etorkizunean energia bermatu dadin.